...

Հեշտ ու համեղ. Բանջարեղենային «ձկնիկներ»

Հեշտ ու համեղ. Բանջարեղենային «ձկնիկներ»

Խմորի մեջ թաթախված բանջարեղեն-ձկնիկները հիշեցնում են ճապոնական տեմպուրան: Իրականում, այս ուտեստը ճապոնական խոհանոց ներմուծել են պորտուգալացի միսիոներները 16-րդ դարում: Ուտեստի համար նախատեսված տոմատի սոուսը կարող եք և չպատրաստել, պարզապես գնել ձեր սիրածը:

Բաղադրիչները
4-6 բաժնի համար

  • 500 գ կանաչ լոբի
  • 130 գ ալյուր
  • 2 ձու
  • 60 մլ ջուր
  • 500 մլ ձիթապտղի ձեթ
  • աղ

Սոուսի համար

  • 5-6 շատ հասած, խոշոր լոլիկ
  • 1 մեծ սպիտակ գլուխ սոխ
  • 4-6 պճեղ սխտոր
  • մի փունջ մաղադանոսի ցողուններ
  • ձիթապտղի ձեթ
  • շաքարավազ, աղ, աղացած սև պղպեղ

Պատրաստման եղանակը

  1. Սոուսի համար լոլիկները մտցրեք եռացրած, ապա սառը ջրի մեջ, կեղևն ու սերմերը հեռացրեք: Լոլիկի միջուկը, սոխն ու սխտորը մանր կտրատեք:
  2. Փոքրիկ կաթսայի մեջ տաքացրեք մի քանի գդալ ձիթապտղի ձեթը, մի փոքր շաքարավազը, կտրտած սոխը, սխտորն ու լոլիկը: Թելով կապեք մաղադանոսի ցողուններն ու ավելացրեք կաթսայի մեջ: Ուժեղ կրակի վրա հաճախակի խառնելով՝ 10 րոպե եփեք: Հանեք կրակի վրայից, մաղադանոսի ցողունները հեռացրեք, սոուսը բլենդերում հարեք՝ մինչև միատարր զանգված ստանալը: Ըստ ճաշակի՝ համեմեք աղով, պղպեղով ու ձիթապտղի ձեթով:
  3. Մեծ թասի մեջ խառնեք ալյուրն ու շատ սառը ջուրը, որպեսզի խիտ խմոր ստացվի: Ձվերը մի փոքր աղի հետ հարեք, ավելացրեք խմորին, լավ խառնեք:
  4. Լոբու ծայրերը հեռացրեք: Լվացեք լոբին ու լավ չորացրեք:
  5. Խոր կաթսայի կամ թավայի մեջ մոտ 4 րոպե տաքացրեք ձեթը: Լոբիները մտցրեք խմորի մեջ, ապա տեղադրեք կաթսայի մեջ, տապակեք, մինչև ոսկեգույն երանգ ստանալը: Պատրաստի լոբիները տեղադրեք անձեռոցիկի վրա, որպեսզի ավելորդ յուղը ներծծվի: Մատուցեք տաք տոմատի սոուսի հետ:

Խորհուրդ: Լոբու հետ կարող եք նաև ցուկինի, բադրիջան ու գազար տապակել: Բադրիջանների վրա լավ է նախապես աղ անել ու 10-20 րոպե թողնել, ապա լվանալ ու չորացնել:

«Չորրորդ իշխանություն», թիվ 27, 2020

ՆՄԱՆԱՏԻՊ ՆՅՈՒԹԵՐ
Դեպի ՎԵՐ