Այո, երեկ հայ հանրությունը ՄԱԿ-ի Անվտանգության Խորհրդի նիստին հետևում էր այնպես, ինչպես՝ Եվրատեսիլին ենք հետևում:
12 point – go to France: Մոտավորապես այսպիսի գնահատականներ էին տրվում: Էս ինչ երկրի դեսպանը լավ երգեց... կներեք՝ ելույթ ունեցավ: Ամերիկացու ելույթն էլ, ոնց որ թե՝ վատը չէր, բայց մի երկու տաղ ֆալշ խփեց, ընդամենը 10 միավոր:
Գաբոնը... դե գաբոնցիները մեր հինավուրց ընկերներն են, նաղդ 12 միավորի էին արժանի:
Իսկ ահա ռուսների ելույթը ահավոր վատն էր, անընդհատ կրկներգ էր, ադրբեջանցին էլ դամ էր պահում, սրանց միավոր չէր հասնում:
Չինաստանի ներկայացուցչի ելույթից բան չհասկացվեց, դրան մյուս Եվրատեսիլում լսենք, հասկանանք, ինչ է ասում:
Հայաստանի ելույթը լավն էր, ազգային-ազատագրական ելևեջներով, սրտաճմլիկ մեցո-սոպրանոյով: Ափսոս, ծերից-ծեր հայկական էր, քչերն էին ընկալում դրա հզորությունը:
Անգլիացու ելույթը սառն էր, ինչպես սառնարանից նոր հանած վիսկին:
Մի խոսքով, լավ Եվրատեսիլ էր, հետաքրքիր, ափսոս, սմս-ներով քվեարկելու հնարավորություն չկար: