...

Քաղցր ու համեղ. Գալակտոբուրեկո

Քաղցր ու համեղ. Գալակտոբուրեկո

Դասական գալակտոբուրեկոն ֆիլո խմորից պատրաստված փակ կարկանդակ է՝ թանձր կրեմ-միջուկով: Սպիտակաձավարը (манная крупа) հանդիպում է հունական կարկանդակների ու աղանդերների մի զգալի մասի մեջ, հատկապես շատ այն օգտագործում են կղզիների բնակիչները: Սպիտակաձավարի հիմքով կարկանդակները փափուկ կազմ ունեն, որն ունակ է ներծծել մեծ քանակի օշարակ (հունական կարկանդակների մյուս անբաժան բաղադրիչը):

Աղանդերն սկսեք պատրաստել մատուցելուց 4 ժամ առաջ:

Բաղադրիչները
8-10 բաժնի համար

  • 500 գ ֆիլո խմոր
  • 150-180 գ կարագ

Կրեմի համար

  • 1 լ կաթ
  • 300 գ շաքարավազ
  • 1 բաժակ սպիտակաձավար
  • 4 ձու
  • 50 գ կարագ
  • 2 ճ. գ. վանիլային շաքարավազ
  • 1 կիտրոնի կեղև

Սիրոպի համար

  • 700 գ շաքարավազ
  • 2 կիտրոնի կեղև ու հյութ

Պատրաստման եղանակը

  1. Պատրաստեք կրեմը: Կաթսայի մեջ կաթ լցրեք, ավելացրեք շերտերով կտրտած կիտրոնի կեղևը: Միջին ուժգնության կրակի վրա կաթը հասցրեք եռման աստիճանի, կիտրոնի կեղևը հանեք կաթսայից:
  2. Կրակը թուլացրեք՝ անընդհատ խառնելով, կաթի մեջ բարակ շիթով ավելացրեք սպիտակաձավարը: Խառնելով եփեք մինչև խտանալը՝ մոտ 7-10 րոպե: Կրակի վրայից հանեք, ավելացրեք կարագը, խառնեք ու մի փոքր հովացրեք:
  3. Ձվերը հարեք սովորական ու վանիլային շաքարավազի հետ և ավելացրեք սպիտակաձավարի կրեմին, լավ խառնեք: Կրեմը ծածկեք կերակրի թաղանթով: Մոտ 1 ժամ թողեք այն, որ լրիվ հովանա:
  4. Կարագը հալեցրեք: Խոնավ սրբիչ պատրաստեք. դրանով ծածկելու եք խմորը, որով աշխատելու եք (ֆիլո խմորը «քմահաճ» է ու շուտ է չորանում): Կարագով պատեք 26-28 սմ տրամագծով տապակը: Դրա մեջ շերտ առ շերտ տեղադրեք ֆիլո խմորի կեսը՝ յուրաքանչյուր շերտը առատ պատելով կարագով: Խմորի ծայրերը թող կախվեն տապակի կողքերից:
  5. Խտացած կրեմը լցրեք խմորի վրա, հարթեցրեք, խմորի ազատ մնացած ծայրերը թեքեք դեպի ներս: Նորից շերտ առ շերտ կրեմի վրա տեղադրեք ֆիլո խմորի մյուս կեսը՝ չմոռանալով շերտերը պատել կարագով: Տապակի կողքից կախված խմորը նորից թեքեք դեպի ներս ուղղությամբ:
  6. Շատ սուր ու բարակ դանակով խմորի վերին շերտի վրա շեղանկյունաձև կտրվածքներ արեք՝ փորձելով չհասնել կրեմին: Կարկանդակի երեսը պատեք մնացած կարագով և տապակը 25-35 րոպեով տեղադրեք 180 աստիճան ցելսիուս տաքության ջեռոցում:
  7. Քանի դեռ կարկանդակը ջեռոցում է, պատրաստեք օշարակը: Կաթսայի մեջ 500 մլ ջուր լցրեք, ավելացրեք շաքարավազը, կիտրոնի կեղևն ու կիտրոնի հյութը, հասցրեք եռման աստիճանի և մոտ 10 րոպե եփեք:
  8. Տաք կարկանդակի վրա լցրեք տաք օշարակը և մոտ 2 ժամ թողեք՝ հովանա: 
  9. Մատուցելուց առաջ կարկանդակը շեղանկյունաձև կտրատեք:

Խորհուրդ: Օշարակը կարող եք պատրաստել՝ կիտրոնի կեղևի փոխարեն նարնջի կամ մանդարինի կեղև, ինչպես նաև դարչինի փայտիկ, մի քիչ մեխակ կամ պարզապես մի պատյան վանիլ ավելացնելով:

«Չորրորդ իշխանություն», թիվ 41, 2020

ՆՄԱՆԱՏԻՊ ՆՅՈՒԹԵՐ
Դեպի ՎԵՐ