Armlur-ը տեսանյութ է հրապարակել, որտեղ ՆԳՆ Դիլիջան քաղաքի քրեականի պետը հյուրանոցներից մեկում ծեծի է ենթարկում 16-ամյա անչափահաս տղային:
Ըստ հրապարակման, Դիլիջանի քրեականի պետ Արսեն Գայթմազյանը մտել է Հաղարծին հյուրանոցային համալիր և համար պատվիրել: Մատուցողն ասել է, որ պատվիրված համարի դիմաց պետք է գումար վճարել, նրանց միջև գումարի շուրջ խոսակցություն է սկսվել, ինչից հետո էլ քրեականի պետը հարվածներ է հասցրել 16-ամյա մատուցողին:
Դեպքի առթիվ հարուցվել է քրեական վարույթ:
«ՉԻ». Հետաքրքիր է, թե ինչով կավարտվի այս պատմությունը: Կարելի է նույնիսկ խաղադրույքներ կատարել տարբերակների վրա:
Իսկ տարբերակները հետևյալն են.
1. Հյուրանոցային համալիրի տնօրինությանը կտուգանեն:
2. 16-ամյա մատուցողին գործից կհանեն:
3. Լրատվամիջոցի դեմ քրեական գործ կհարուցեն՝ տեսանյութի հեղինակի անունը չասելու համար:
4. Քրեականի պետին ամոթանք կտան:
5. Քրեականի պետին աշխատանքից կազատեն:
6. Վարույթը կկարճվի հանցակազմի բացակայության պատճառով:
Հաշվի առնելով վերջին տարիների նմանատիպ դեպքերն ու դրանց հաջորդած քրեական գործերի, քննությունների արդյունքները, միանգամից ասենք, որ ամենահավանականը 6-րդ տարբերակն է: Դե, մենք դեպք ունենք, երբ փողոցը թույլատրելի հատվածով անցնող հղի կնոջը կառավարական մեքենան վրաերթի է ենթարկում, կինը մահանում է, ու վերջ, ոչ ոք չի պատժվում:
Իսկ այստեղ ընդամենը մի քանի մուշտի են տվել: Դրա ի՞նչը պատժես: