Հայկ Մարտիրոսյան. Կենդանակերպի նշանը՝ ագռավ
Շաբաթվա ընթացքում կդառնաք ևս երեք բնագավառի դոկտոր. գինեկոլոգիայի, սահմանների փակման և Վանգայի տեղայնացման ոլորտներում:
Երկուշաբթի կհայտարարեք, որ, ըստ ձեր տվյալների, ազգաբնակչության 70 տոկոսը արդեն վարակված է կորոնավիրուսով, որովհետև իշխանության կողմնակից լինելը և կորոնավիրուսով վարակված լինելը նույն բանն է:
Երեքշաբթի կազդարարեք, որ ստեղծել եք հակավիրուս, բայց կտրամադրեք, երբ ունենաք իշխանություն:
Չորեքշաբթի կհայտարարեք, որ ինքնակամ եք հեռացել Հովիկ Աբրահամյանի խորհրդականի պաշտոնից, որովհետև կասկածում էիք, որ նա ևս վիրուսակիր է:
Հինգշաբթի Արա Պապյանի հետ կներկայացնեք ազգային դոկտրինը, թե ինչպես պայքարել կորոնավիրուսի դեմ: Հիմնական մեխը կլինի ազատագրել Արևմտյան Հայաստանը և այնտեղ տեղափոխել վարակվածներին:
Ուրբաթ օրը մի փոքր թուլություն և ջերմություն կունենաք: Մի շտապեք վհատվել: Բոլոր մեծ մտածողներն էլ ժամանակ առ ժամանակ ունենում են նման խնդիրներ:
Շաբաթ-կիրակին անցկացրեք որևէ տրանզիտ զոնայում: Ստեղծագործական աշխատանքը մի փոքր կտուժի, բայց պահպանած կլինեք ազգային գենոֆոնդը:
«Չորրորդ իշխանություն», թիվ 24, 2020