Երևանի նախկին քաղաքապետ Ալբերտ Բազեյանը «Հրապարակի» հետ զրույցում պատասխանել է հետևյալ հարցին. «Պարոն Բազեյան, մեր նախորդ զրույցի ժամանակ նշում էիք, որ «Միասին» շարժումը նախատեսում է մեծ հանրահավաք, որն այս իշխանություններին կստիպի հրաժարական տալ: Հանրահավաքը կայացավ, սակայն այն սակավաթիվ էր, ինչո՞ւ»:
«Ես այդ հանրահավաքին չեմ մասնակցել»:
«ՉԻ». Վերջապես ստացանք այն հարցի պատասխանը, թե ինչու ընդդիմությունը չի կարողանում իշխանափոխություն կատարել, ու նրա կազմակերպած ակցիաները, հանրահավաքները սակավամարդ են:
Մինչ մենք մտածում էինք, թե պատճառը ընդդիմության գաղափարազուրկ էությունն է, կառավարման նախկին 20 տարվա գործունեությունը, իրականում բան չի ստացվում, որովհետև Ալբերտ Բազեյանը դրանց չի մասնակցում:
Դե, օրինակ, «Միասին» շարժումը էն օրը հայ-հայ իշխանափոխություն էր անում, բայց Բազեյանը չեկավ: Սպասեցին, սպասեցին, իշխանություններն էլ արդեն ճամպրուկները հավաքած, պատուհանից նայում էին, որ հենց Բազեյանը երևա, հրաժարական տան, էն էլ... չեղավ: Երևի խցանումների մեջ է եղել:
Այնպես որ, եթե ընդդիմությունն ուզում է իշխանափոխություն անել, առաջին քայլը, որ պետք է ձեռնարկի, Ալբերտ Բազեյանի ներկայությունն ապահովելն է: