...

Արհեստական գնաճ անշարժ գույքի շուկայում

Արհեստական գնաճ անշարժ գույքի շուկայում

Ի՞նչ է կատարվում անշարժ գույքի շուկայում

Հայաստանում անշարժ գույքի գները էականորեն աճում են: Համաձայն պաշտոնական վիճակագրության` Երևանում բնակարանների գները մեկ տարում աճել են 9,9 %-ով:

Վարչապետ Նիկոլ Փաշինյանը սա  կարևորագույն ձեռքբերում է համարում: Միացյալ նահանգներում նա սփյուռքահայերին այս մասին հիշեցրել է: Այս հայտարարությունից հետո անշարժ գույքի առք ու վաճառքով զբաղվող գործակալները սպասում են հերթական թանկացմանը:

Նրանք  «ՉԻ»-ի հետ զրույցում նշեցին, որ ամեն անգամ  վարչապետի հայտարարությունից հետո անշարժ գույքի գներն աճում են:

«Պրեմիում  Ռեա»  անշարժ գույքի գործակալության տնօրեն Վահե Խանգելդյանի  դիտարկմամբ` շուկայում արհեստական գնաճ է տեղի ունենում:

«Եթե բնակարանի գինը 20 տոկոսով է բարձրացել, հայն իր խասյաթի համաձայն` մոտ 40 տոկոսով է բարձրացնում»,- նկատեց գործակալը:

Վահե Խանգելդյանն անշարժ գույքի շուկայում է ու վաճառք է անում արդեն 5 տարի: Մեր զրուցակիցը փաստում է, որ հեղափոխությունից հետո անշարժ գույքի վաճառքն ավելացել է: Գնորդներն էլ հիմնականում դրսից են: Տասն օր առաջ է Ամերիկայից եկած մի հայ երիտասարդի տուն վաճառել:

«Բիզնես  է արդեն դարձել, որ տունը գնում են և վարձակալության հանձնում: Վարձակալությամբ տրվող բնակարանների պահանջարկը ևս ավելացել է, գինը` նույնպես:  Եթե առաջ տան վարձը 80 000 էր, հիմա 120 000 է դարձել»,- նշեց նա:

Գործակալները հայտնում են, որ տեղ-տեղ բնակարանների գներն աճել են անգամ  50 տոկոսով: Եթե մինչև հեղափոխությունը Արաբկիր վարչական շրջանում 3 սենյականոց  բնակարանը միջինը 50 000 դոլարով էր վաճառվում, ապա այսօր գինը մինչև 90 000-ի սահմաններում է տատանվում:

«Սիլվեր Ռ. Ե. Ա»  անշարժ գույքի գործակալության տնօրեն Անդրանիկ Հարությունովը գնաճը բացատրում է պահանջարկի ավելացմամբ:

Վերջին ամիսներին նրա հաճախորդների 80 տոկոսը արտասահմանցիներ են եղել:

ԱՄՆ-ում գտնվող վարչապետ Փաշինյանը արտերկրում բնակվող հայերին կոչ է արել Հայաստանում տուն գնել` այդպիսով հուսալի ներդրում անելով հայրենիքում:

Անդրանիկ Հարությունովն ասում է, որ մի շարք արտասահմանցիներ արդեն այդպես են անում: Բնակարան են գնել, և  իր ղեկավարած գործակալությունն էլ միջնորդում է, որ դրանք վարձակալության հանձնվեն:

«Եթե բնակարանի պահանջարկ կա, շինարարությունն  աճում է, սա էլ հանգեցնում է աշխատատեղերի ավելացմանը: Շինանյութի ներկրումն է ավելանում` բերելով հարկերի ավելացմանը»,- կարևորեց մեր զրուցակիցը:

Ըստ նրա` Երևանում ցանկացած նորամուծություն ազդում է բնակարանների գների վրա:

«Արամի, Բյուզանդի փողոցների շրջակայքում հենց նոր այգի բացվեց, այդտեղի պահանջարկն այն կարգի ավելացավ, որ գները Հյուսիսային պողոտայի տների արժեքին մոտ հասան»,- շեշտեց նա:

Վարչապետի այս միտքն անհանգստացրել է մեկ այլ գործակալի: Ասում է, երբ արտասահմանցին մեր երկրում տուն է գնում և վարձակալության հանձնում, կապիտալը արտահոսում է:

Գործարքներն ավելացե՞լ են, թե՞ նվազել. փաստեր

Անշարժ գույքի  շուկայում առք ու վաճառքը տատանվում է, գնային վայրիվերումներ են տեղի ունենում: Վերջին տվյալներն անկում են ցույց տալիս: Կադաստրի պետական կոմիտեն արձանագրել է, որ  օգոստոսին հանրապետությունում գրանցված  առք ու վաճառքի գործարքների քանակը հուլիսի համեմատ նվազել է 3,6 %-ով,  իսկ 2018 թվականի օգոստոսի համեմատ` աճել 10,1 %-ով: 

Երևան քաղաքում բազմաբնակարան բնակելի շենքերի բնակարանների առուվաճառքի գործարքների քանակը 2019 թվականի հուլիսին աճել է 7,6  %-ով, իսկ  նախորդ տարվա համեմատ` նվազել 7,6 %-ով:

Հուլիսին Երևանում բազմաբնակարան բնակելի շենքերի բնակարանների առք ու վաճառքի գործարքների քանակը հունիսի համեմատ աճել է 5,5 տոկոսով, իսկ 2018թ. հուլիսի համեմատ նվազել է 14,8 տոկոսով:

Ընդ որում առուվաճառքի գործարքներից 196-ի դեպքում օտարերկրյա քաղաքացիները հանդիսացել են միայն գնորդ, 349-ի դեպքում` միայն վաճառող:

Նախորդ ամսում գործարքներից 147-ի դեպքում գնորդ են հանդիսացել օտարերկրյա քաղաքացիները, 329-ի դեպքում էլ նրանք վաճառողներ են եղել:

Էմոցիոնալ ազդակ շուկայի համար

Տնտեսագետ Մովսես Արիստակեսյանը  անշարժ գույքի շուկայում որոշակի աշխուժացումը պայմանավորում է էմոցիոնալ գործոնով` որպես հետևանք  մեր երկրում տեղի ունեցած իրադարձությունների ու արտասահմանում բնակվող հայերի` հայրենիքում բնակարան ձեռք բերելու ձգտման: Ըստ նրա, սակայն առաջարկի ավելացման դեպքում, գները կարող են նվազել: 

Մանյա Պողոսյան

«Չորրորդ իշխանություն», 2, 2019

ՆՄԱՆԱՏԻՊ ՆՅՈՒԹԵՐ
Դեպի ՎԵՐ