Սեյրան Օհանյանը ֆեյսբուքի իր էջում գրել է. «ՀՀ Սահմանադրությամբ իրեն վերապահված պարտականությունները պատշաճ չկատարելով, իր ոչ հայամետ պետական քաղաքականությամբ, անարդյունավետ կառավարմամբ, բնակչության պառակտմամբ և միջազգային ներգրավվածությունն ապահովող ոչ լիարժեք արտաքին քաղաքականությամբ, երկիրը ներքաշեց ազգակործան պատերազմի մեջ և նույնիսկ մրցունակ Բանակով տարավ պարտության»։
«ՉԻ». Ախր, սրանց ո՞նց բացատրես, որ Նիկոլ Փաշինյանի սխալները որևէ կերպ չեն արդարացնում իրենց հանցագործությունները:
Օհանյանը չի հասկանում, որ նույն հարցադրումները կարելի է անել 2016 թվականի վերաբերյալ:
Եթե բանակն այդքան մրցունակ էր, ի՞նչն էր խանգարում 2016 թվականին անցնել հակագրոհի և առնվազն հետ վերցնել կորցված տարածքները: Թե՞ ձայններդ տաք տեղից է գալիս, որովհետև այն ժամանակ Ռուսաստանը արագ կանգնեցրեց պատերազմը և չթողեց, որ ավելին կորցնեք:
Բանակը ինչո՞վ էր մրցունակ. չլինի՞ Չեխիայում կառուցված հյուրանոցներով կամ Վահագնի թաղամասի դղյակներով: Կներեք, որ այս զինատեսակը շատ դանդաղաշարժ է, ուշ է մոտենում առաջնագծին ու ցուցադրում իր կրակային ներուժը:
Անարդյունավետ կառավարման մասին հանրապետականների նախարարն ընդհանրապես իրավունք չունի խոսել, դա հակացուցված է այդ ժամանակվա ցանկացած պաշտոնյայի:
Եվ վերջապես, պարտություն կրած հրամանատարներից մեկը նախ պետք է վերլուծի սեփական սխալները, հրապարակային ընդունի իր բացթողումները, նոր ուրիշներին մեղադրանք ներկայացնի: Զինվորականի պատիվը նախ և առաջ դա է պահանջում: