Վերջին շաբաթվա ընթացքում Ադրբեջանի պաշտպանության նախարարությունը գրեթե ամեն օր կեղծ հայտարարություններ է տարածում, թե իբր հայկական ուժերը կրակել են շփման գծի տարբեր ուղղություններով, իսկ իրենք քայլեր են ձեռնարկել, ինչից հետո կրակը լռեցվել է:
Մենք բոլորս գիտենք, որ երբ Ադրբեջանը պլանավորում է հերթական սահմանային սադրանքը, դա իրականացնելուց առաջ կազմակերպում է այդ սադրանքի տեղեկատվական լեգիտիմացման կեղծ հենքը:
Միջազգային հանրության բոլոր դերակատարները, ովքեր հետաքրքրված են հայ-ադրբեջանական խաղաղության գործընթացով և Լեռնային Ղարաբաղի հակամարտության կարգավորմամբ, պետք է շատ ուշադիր հետևեն և հստակ գիտակցեն, որ հերթական անգամ Ադրբեջանը սադրանքի նախապատրաստական գործընթաց է սկսել։
Այս իրավիճակում միջազգային թիրախավորված արձագանքը կարող է կանխել նախապատրաստվող այդ նոր սադրանքը:
ՉԻ.- Իսկ եթե միջազգային հանրությունը չարձագանքի՞: Էն էլ՝ թիրախավորված: Այսինքն, հակառակորդը Հայաստանի կամ Արցախի դեմ ուժ է կիրառում, մենք այստեղ ասում ենք՝ միջազգային հանրություն, դե, մի բան արա, մի հատ պատասխան հակահարձակում սկսի:
Մեզ թվում էր, թե երկրի անվտանգության թիվ մեկ երաշխիքը Զինված ուժերն են, բայց, չէ, պարզվում է՝ միջազգային հանրությունն է: Համենայնդեպս, այդպես է ստացվում Էդմոն Մարուքյանի գրածից:
Երևի Սահմանադրությունն էլ փոխենք, ուրեմն: Գրենք. յուրաքանչյուր ոք պարտավոր է ծառայել միջազգային հանրությունում: