ԱԺ ՔՊ խմբակցության պատգամավոր Անդրանիկ Քոչարյանը, անդրադառնալով ՌԴ ԱԳՆ պաշտոնական ներկայացուցիչ Մարիա Զախարովայի հայտարարություններին, ասել է. «Տիկին Զախարովան նաև ասել էր, որ Ռուսաստանի Դաշնության անմիջական մասնակցությամբ գործողությունները ստացել են դադար: Կասկածի տակ չեմ դնում տիկին Զախարովայի ասածները, որ ինչ-որ ձևաչափով մասնակցել են, բայց կռվել է ՀՀ զինված ուժերը, եթե մենք չկռվեինք, զոհեր չտայինք, ինչքան ուզում է՝ ՌԴ արտաքին գերատեսչությունը զանգեր աներ աջ ու ձախ, դա խնդրի լուծմանը չէր տանելու, և խնդիրը լուծվել է բացառապես մեր ԶՈՒ-երի և մեր զինվորականության քաջարի գործողությունների արդյունքում»:
«ՉԻ». Ուշադրություն դարձրեք, որ ասում է՝ խնդիրը լուծվել է: Այսինքն, նոյեմբերի 9-ի եռակողմ համաձայնագիրը դա խնդրի լուծում էր: Երևի հենց սկզբից էլ տակտիկան դա է եղել. խնդիրը լուծել ռազմական պարտությամբ:
Բայց դա չի էականը. հենց իշխանություններն են բազմիցս ասել, որ դեռ հոկտեմբերի կեսերին հնարավոր էր կանգնեցնել պատերազմը՝ ընդունելով Ռուսաստանի ներկայացրած պլանը: Չեն արել դա, հետո արդեն ուրիշ պլան են ստորագրել, որը որևէ կապ չի ունեցել հոկտեմբերի կեսերին սեղանին դրված լուծման հետ:
Հարց է առաջանում. եթե հոկտեմբերի կեսերին պատերազմը դադարեցնելու ռուսական առաջարկը չեք ընդունել, նոյեմբերի 9-ի համաձայնագիրն ինչի՞ էիք ստորագրել, էլի մերժեիք, շարունակեիք պատերազմը: Եռակողմ համաձայնագիր եք ստորագրել, էդ կողմերից մեկն էլ Ռուսաստանն է, չստացվե՞ց, որ Ռուսաստանի անմիջական մասնակցությամբ է այդ համաձայնագիրը ստորագրվել: