«Հայաստան» դաշինքի պատգամավորի թեկնածու, դաշնակցական Գեղամ Մանուկյանը՝ ԱԺ «Իմ քայլը» խմբակցության պատգամավոր Վլադիմիր Վարդանյանի ֆեյսբուքյան լուսանկարի տակ մեկնաբանություն է թողել: Նա գրել է (ուղղագրությունը չենք փոխում).
«Բարև... մնացածը գիտես: Բ***.-ի տղա (նիկոլի կողքին կանգնած ցանկացածը բ***-ի տղա է): Մի նեղավիր: Վովա: Դու ուղղակի նրանցից մեկն ես»:
«ՉԻ». Այ, բա որ ասում ենք: Նորմալ, քաղաքակիրթ ընտրություններ են, չէիք հավատում: Երբեք չէինք կասկածում, որ Ռ. Քոչարյանի պես կրթված, պարկեշտ, կուլտուրական մարդու կողքին հայտնվածները ահա այսպիսի նախանձելի վարքագծով աչքի կընկնեն, օրինակ` կծառայեն բոլորին, մատաղ սերնդի դաստիարակության գործում անուրանալի դեր կունենան:
Հիմա համոզվեցի՞ք: Բա որ Դաշնակցության կարկառուն ներկայացուցիչը, մի ամբողջ հեռուստաընկերության գլխավոր խմբագիրն (եթե չենք սխալվում) իրեն այսպես է պահում, պատկերացնո՞ւմ եք, թե Քոչարյանի ձեռքի տակ մտած երկրորդ, երրորդ էշելոնի ներկայացուցիչներն ինչ հրեշտակային բնավորության տեր մարդիկ են, ինչ առաքինի են, ինչպես են տենչում օր առաջ հերոսական գործեր անել, ինչպես դա արել են 1998-2008 թվականներին: Սրբի կտորներ են հավաքվել այս «Հայաստան» դաշինքում:
Հ.Գ. Հետաքրքիր է, որ այս վերջին 100 տարում ոչ մեկի մտքով չէր անցել Ալեքսանդրապոլի կապիտուլյացիան ստորագրած այրերին, Հայաստանի 60 տոկոսը հանձնածներին ու նրանց գործը շարունակողներին անվանել ոչ այնքան հաջող մարդկանց տղաներ: Կամ Պողոս Պողոսյանի դիակի վրա առևտուր անողներին որակեին ոչ այնքան հաճելի մարդկանց ժառանգներ:
Հ.Գ-2. Իսկ Մարդու իրավունքների պաշտպանը հանկարծ թող ձեն չհանի. այստեղ ընդամենը ապօրինի զավակների և նրանց հայրության ճանաչման հարց է քննարկվում:
Հ.Գ.-3. Հայ Եկեղեցին էլ թող շարունակի իր հոգեփրկչական գործունեությունը, բարոյականություն քարոզի, բայց հանկարծ ինքն էլ թող ձեն չհանի, քանի որ սա լիովին տեղավորվում է ռազմահայրենասիրական, ազգային ավանդույթների մեջ: