ՀՀ հատուկ հանձնարարություններով դեսպան Էդմոն Մարուքյանը ֆեյսբուքյան իր էջում գրել է. «Այսօր ամեն բանից խոսվեց, բայց ոչ ոք չասաց, որ երկու տարի առաջ Հայաստանում կանխվեց հեղաշրջման փորձը:
Դժվարանում եմ պատկերացնել, թե ի՞նչ կմնար Հայաստանից, եթե պատերազմի պարտության այդ ողբերգությանը գումարվեր նաև հեղաշրջումը»:
«ՉԻ». Ըհը, մենք ասում ենք. երկու տարի առաջ՝ նոյեմբերի 9-ի գիշերը, Հայաստանում կանխվեց հեղաշրջման փորձը: Թե որ Մարուքյանը շատ է ցանկանում, դատապարտում ենք, խարազանում, քննադատում:
Բա հետո՞. հեղաշրջումը կանխվել է (թեպետ, առ այսօր պարզ չէ, թե դա ինչ հեղաշրջում էր, եթե այդ գործով կազմակերպիչներ չկան, հեղաշրջումն ուղղորդողներ չկան, բայց դա այլ հարց է), բայց ի՞նչ է մնացել Հայաստանից: Այն իրավիճակը, որը հիմա ունենք, ավելի լավ է, քան այն վիճակը, որը կարող էր լինել հեղաշրջման դեպքո՞ւմ:
Գովելու բան են գտել. ասում են՝ գիտեք, էս երկու տարում մենք ավելի քիչ կորուստներ ենք ունեցել, քան եթե հեղաշրջումը ստացվեր:
Միանգամից ասենք, որ նույն բանն էր լինելու, պարզապես այս կորուստներին գումարվելու էր հալածանքների, բռնությունների, համատարած վրեժխնդրության ալիքը: