Էկոնոմիկայի նախարար Վահան Քերոբյանը լրագրողների հետ զրույցում հայ-թուրքական սահմանների հնարավոր բացումը համեմատել է փակուղու և խաչմերուկի տարբերությունների հետ. «Սահմանի բացվելուց հետո Հայաստանը փակուղուց կդառնա խաչմերուկ: Բնականաբար, սրա արդյունքում կունենանք շատ մեծ տնտեսական էֆեկտներ»:
«ՉԻ». Այսօր Նյու Վասյուկիների օր է: Ինչ-որ նոր ու էֆեկտիվ գյուղեր են որոշել կառուցել, խաչմերուկից են խոսում: Նախ, դեռ պարզ չի՝ Հայաստանը խաչմերուկ կդառնա՞, թե՞ կսարքեն խաչմերուկ:
Դարձնեն մի խաչմերուկ, որտեղ կարգավորողը մենք չենք լինելու և ըստ այդմ՝ դրա էֆեկտներն էլ ուրիշներին են հասնելու: Իսկ առայժմ բանը դրան է գնում, որ խաչմերուկի հարցը մեզանից չի կախված լինելու:
Մի հատ ուրիշ էֆեկտի մասին Նիկոլ Փաշինյանն է խոսել: Խաչքարերի էֆեկտի մասին: Ասում է. «Հայաստանում տարերային, նույնիսկ՝ խուճապային տեմպերով խաչեր են հայտնվում, մայրուղիներին՝ խաչքարեր. միշտ չէ, որ դրանք քրիստոնեության հետ կապ ունեն»:
Թվում է, թե լավ բան է ասում: Բայց սա ասում է ու հաջորդ րոպեին Գագիկ Ծառուկյանին Քրիստոսի արձան տեղադրելու թույլտվություն է տալիս: Այսինքն՝ Հայաստանում հիմա էլ խուճապային տեմպերով Քրիստոսի արձաններ են հայտնվելու: Էնքան, որ տուրիստները ստիպված պիտի լինեն մի տարի մնան երկրում, որ հասցնեն հիանալ բոլոր կոթողներով: Ահա այդպիսի էֆեկտ: