...

Հեշտ ու համեղ. Ձկով ռիզոտտո

Հեշտ ու համեղ. Ձկով ռիզոտտո

Սլովենական խոհանոցում՝ Իստրիայի շրջանում, իտալական խոհանոցի ազդեցությունը մեծ է, ինչը զարմանալի չէ, քանի որ այդ տարածաշրջանը ժամանակին Իտալիային է պատկանել: Այստեղից էլ ռիզոտտոն և ուտեստի մեջ գինի օգտագործելը, չնայած այն պատրաստելու եղանակը՝ պանրի ու ձկան համադրությունը, ավելի շատ սլովենական է:

Բաղադրիչները
6 բաժնի համար

  • 400-600 գ ձկան փափկամիս
  • 400 գ բրինձ ռիզոտտոյի համար (Արբորիո)
  • 2 պճեղ սխտոր
  • 5-6 ճյուղ մաղադանոս
  • 200 մլ սպիտակ չոր գինի
  • 70-100 գ կարագ
  • 2 ճ.գ. տոմատի մածուկ
  • 2 ճ.գ. սպիտակ գինու քացախ
  • 50 մլ ձեթ
  • 1 լ ջուր
  • աղ
  • աղացած սև պղպեղ
  • 50 գ քերած պանիր՝ մատուցելու համար

Պատրաստման եղանակը

  1. Մաքրեք ու մանր կտրատեք սխտորը: Հաստ հատակով կաթսայի մեջ տաքացրեք ձեթը, լցրեք կտրտած սխտորն ու թույլ կրակի վրա, խառնելով 1 րոպե տապակեք:
  2. Սխտորին ավելացրեք բրինձն ու տոմատի մածուկը, լավ խառնեք, աղ արեք և վրան լցրեք եռացրած ջուրը: Կրակն ուժեղացրեք, դարձրեք միջին ուժգնության և ջուրը հասցրեք եռման աստիճանի:
  3. Փակ կափարիչի տակ եփեք բրինձը մինչև ջուրը ներծծվի, գոլորշիանա՝ մոտ 12 րոպե: Ապա բրնձի վրա լցրեք գինին, կրակը թուլացրեք և շարունակեք եփել մինչև բրինձը փափկի՝ մոտ 10 րոպե:
  4. Առանձին եփեք ձուկը թույլ եռացող, քացախ ավելացրած աղաջրում մինչև պատրաստ լինելը՝ մոտ 7-12 րոպե:
  5. Ձուկը ջրի մեջ թողեք մի փոքր հովանա, եթե փշեր ու ոսկորներ կան, հեռացրեք, փափկամիսը խառնեք պատրաստի բրնձի հետ: Մաղադանոսը մանր կտրատեք:
  6. Ռիզոտտոյին ավելացրեք մեծ կտորներով կտրտած կարագը, մաղադանոսն ու աղացած սև պղպեղը, խառնեք:
  7. Մատուցեք՝ վրան լցնելով քերած պանիրը:

Խորհուրդ: Ռիզոտտոյի ջրիկ լինելու չափը կարգավորեք ձեր ճաշակով: Եթե ջրիկ ռիզոտտոյի սիրահար եք, 1 լիտրից մի փոքր շատ ջուր վերցրեք: Ձկան հարցում սահմանափակումներ չկան. կարող եք ցանկացած տեսակի ձուկ օգտագործել:

ՎԱՐԿԱՆԻՇ

   349 ԴԻՏՈՒՄ

Տարածեք

ՆՄԱՆԱՏԻՊ ՆՅՈՒԹԵՐ
Դեպի ՎԵՐ