Ոսպով ապուրը Թուրքիայում նույնքան հայտնի է, որքան բորշչը՝ Ռուսաստանում: Եվ ամեն տանտիրուհի այստեղ այս ապուրի պատրաստման իր յուրատեսակ տարբերակն ունի: Ներկայացնում ենք դրանցից մեկը:
Բաղադրիչները
- 1 բաժակ կարմիր ոսպ
- 1 լիտր հավի կամ բանջարեղենի արգանակ
- 1 մեծ գլուխ սոխ
- 1 մեծ գազար
- 70 գ կարագ
- 200 մլ կաթ
- 2 ձվի դեղնուց
- 1 ճ.գ. ալյուր
- 4 միջին կտոր հաց, առանց կեղևի
- աղ
Պատրաստման եղանակը
- Մաքրեք ու մանր կտրատեք սոխն ու գազարը: Հաստ հատակով կաթսայի մեջ տաքացրեք կարագը, լցրեք կտրտած սոխն ու գազարը: Միջին ուժգնության կրակի վրա տապակեք, մինչև ոսկեգույն երանգ ստանալը: Մոտ 10 րոպե:
- Ավելացրեք ալյուրը, ևս 1-2 րոպե տապակեք: Միաժամանակ մեկ ուրիշ կաթսայում եռացրեք արգանակը:
- Սոխով ու գազարով կաթսայի մեջ լցրեք ոսպը, ավելացրեք եռացրած արգանակը, թողեք եռա: Կաթսայի կափարիչը կիսաբաց արեք, եփեք, մինչև ոսպը փափկի՝ մոտ 15-20 րոպե:
- Քանի դեռ ապուրը եփում է, պատրաստեք չորահացերը՝ նրա հետ մատուցելու համար: Թավայի մեջ մնացած կարագով տապակեք հացերը բոլոր կողմերից, մինչև ոսկեգույն երանգ ստանալը:
- Կաթը մի փոքր տաքացրեք, ավելացրեք ձվի դեղնուցները, խառնեք: Ստացված զանգվածը լցրեք ապուրի մեջ, խառնեք, կրակի վրա տաքացրեք ևս 2-3 րոպե: Աղ արեք: Մատուցեք տաք վիճակում չորահացերի հետ միասին:
Խորհուրդ: Ապուրի մեջ կարող եք նաև կիտրոնի հյութ, պապրիկա և կտրտած կանաչի՝ մաղադանոս ու անանուխ ավելացնել: