Հայաստանի Ազգային ժողովն Արմեն Սարգսյանից նախագահի պաշտոնից հրաժարական տալու դիմումը հետ վերցնելու դիմում չի ստացել։ Եվ այսօր վերջին օրն է, երբ Արմեն Սարգսյանը կարող է դիմումը հետ վերցնել:
Ու թեպետ Վահագն Խաչատրյանին շատերն արդեն համարում են գրեթե նոր նախագահ, քիչ չեն նաև կարծիքները, որ Արմեն Սարգսյանը կարող է ձիով քայլ անել ու դիմումը հետ վերցնել: Օրինակ՝ կայֆի համար:
Ու ասենք ձեզ, որ նման սցենարը ֆանտաստիկ չի թվում, քանի որ նախադեպ արդեն ունեցել ենք: Անեկդոտիկ մի պատմություն եղել է խորհրդարանում՝ 2000 թվականին:
Ուրեմն, 2000-ի սեպտեմբերին մամուլում, իշխանական կուլուարներում հանկարծ շշուկներ, խոսակցություններ տարածվեցին, որ ԱԺ նախագահ Արմեն Խաչատրյանը հրաժարական է տալու: Արմեն Խաչատրյանը ԱԺ նախագահ էր ընտրվել 1999թ. հոկտեմբերի 27-ի ոճրագործությունից հետո, որի ժամանակ նա, ի դեպ, հրազենային վիրավորում էր ստացել: «Միասնություն» դաշինքը նրան ԱԺ նախագահ ընտրեց, Տիգրան Թորոսյանին էլ՝ ԱԺ փոխնախագահ:
Եվ ահա խոսակցություններ սկսվեցին, որ Արմեն Խաչատրյանը հրաժարական է տալու, Տիգրան Թորոսյանն է նրան փոխարինելու: Թե ինչի պիտի հրաժարական տար, ոչ ոք չգիտեր. մի տեսակետ կար, որ ՀՀԿ-ի ձեռքում էին գործադիր իշխանության հիմնական լծակները, հիմնական իշխող ուժ էր համարվում ՀՀԿ-ն, իրենք որոշել են, թե ինչու այդ դեպքում ԱԺ նախագահի պաշտոնն իրենցը չպետք է լինի:
Այդ օրը, եթե ճիշտ ենք հիշում՝ 2000-ի սեպտեմբերի 26-ին, խորհրդարանում Արմեն Խաչատրյանը օրակարգ մտցրեց իր հրաժարականի հարցը, ինչը հանրապետականների համար անսպասելի չէր: Գիտեին, որ հրաժարական է տալու, սկսեցին իրար ետևից ելույթներ ունենալ, որոնք ավելի շատ հոգեհանգստի կենացներ էին հիշեցնում: Բոլորը ընդգծում էին Արմեն Խաչատրյանի քաղաքական անցյալը, դերը պետականության գործում, ներդրումը եսիմ որտեղ, որ լավ մարդ է, ազնիվ է, իր հետ հաճելի էր աշխատել և այլն: Մանրից հրաժեշտ էին տալիս:
Կենացներն ավարտվեցին, հարցը դրվեց քվեարկության, հրաժարականն ընդունելի առաջարկին կողմ քվեարկեց 63 պատգամավոր, և Արմեն Խաչատրյանը հայտարարեց, որ... որոշումն ընդունված չէ:
Ու այդտեղ իսկական կինոն սկսվեց: Այն հանրապետական պատգամավորները, որոնք ընդամենը 5 րոպե առաջ մինչև երկինք փառաբանում էին Արմեն Խաչատրյանին, սկսեցին նրա հասցեին թուք ու մուր անել, ինքնակոչ համարել, Տիգրան Թորոսյանը հայտարարեց, որ ստանձնում է ԱԺ նախագահի ժամանակավոր պաշտոնակատարի լիազորությունները: ՀՀԿ-ից Վազգեն Խաչիկյանը, երբ խոսք խնդրեց, Արմեն Խաչատրյանին դիմելով, ասաց՝ պրն այս պահի դրությամբ իրեն ԱԺ նախագահ համարող անձնավորություն, որին Արմեն Խաչատրյանը արձագանքեց, թե տղա ջան, քեզ կոռեկտ պահի:
Արդյունքում խորհրդարանում երկիշխանություն ստեղծվեց. Արմեն Խաչատրյանն ասում էր՝ ես եմ ԱԺ նախագահը, Տիգրան Թորոսյանն էլ՝ թե բա ես:
Այս կլոունադան ավարտվեց նրանով, որ ՀՀԿ-ն ընդունված համարեց Արմեն Խաչատրյանի հրաժարականի հարցը, բայց հետո որոշման սահմանադրականությունը ճշտելու համար դիմեցին ՍԴ, որն էլ վճիռ կայացրեց, որ Արմեն Խաչատրյանի հրաժարականի հարցը ԱԺ կանոնակարգի մի շարք խախտումներով է օրակարգ մտցվել, հետևաբար՝ անօրինական է, հետևաբար, հրաժարականն ընդունելու քվեարկությունը սխալ է, և Արմեն Խաչատրյանը շարունակելու է ԱԺ նախագահ լինել:
Արդեն ավելի ուշ, ներիշխանական շրջանակներում եղած խոսակցություններից, տեղեկատվական արտահոսքերից պարզ դարձավ, որ այս ամենը Քոչարյանի ու նրա թիմի սցենարն է եղել, որի նպատակն է եղել ՀՀԿ-ին փչացնելը:
Այնպես որ, եթե հանկարծ Արմեն Սարգսյանը հրաժարականի դիմումն այսօր հետ վերցնի, կարող եք չզարմանալ, քանի որ մեր մոտ ամեն ինչ պատահում է: