ԱԺ «Իմ քայլը» խմբակցության պատգամավոր Հովիկ Աղազարյանն «Ա1+»-ի հետ զրույցում չի ընդունել, որ այս պատերազմում Հայաստանը պարտվեց. «Ախր ես կոնկրետ պարտություն բառի հետ համաձայն չեմ, եթե մենք պարտվել ենք, դա նշանակում է՝ մեր հակառակորդը հաղթել է, ճի՞շտ եմ հասկանում: Եթե հաղթել է, եկեք ձևակերպենք նրանց հաղթանակի մեխանիզմը, իրենք ունեցել են երկու նպատակ՝ մաքսիմում նպատակ՝ հայաթափեն Արցախը, մեկընդմիշտ վերացնեն այդ հարցը և նպատակ մինիմում՝ շրջանների վերադարձ ու Արցախը, որպես հավանական ինքնավարություն ունեցող սուբյեկտ, Ադրբեջանի կազմի մեջ: Արցախը հայաթափվե՞լ է, նման բան չկա»:
«ՉԻ». Բոլորդ էլ գիտեք, տեսնում եք, որ վերջին 2 տարում մենք շատ հաճախ քննադատում էինք ընդդիմությանը և նրա ներկայացուցիչներին: Քննադատում էինք նրանց ապակառուցողական գործունեությունը, պոպուլիստական գործելաճը, տարբեր հարցերում նրանց դիրքորոշումները, մոտեցումները, դիլետանտիզմը:
Այսօր հարթակում գտնվող քաղաքական ուժերին քննադատելու առիթներ նույնպես շատ կան: Բայց իշխանության ներկայացուցիչները պարզապես ժամանակ ու հնարավորություն չեն տալիս, որ նրանց անդրադառնանք:
Երեկ Պետրոս Ղազարյանի հյուրը «Իմ քայլի» Մարիա Կարապետյանն է եղել: Փառք աստծո, չենք դիտել, բայց, դատելով արձագանքներից, Լենա Նազարյանից բեթար է եղել: Բայց Հովիկ Աղազարյանը բոլորին տվեց, անցավ:
Հասկանո՞ւմ եք, իշխանությունները հպարտանում են, որ Արցախում հայ է մնացել: Նոյեմբերի 10-ի կապիտուլյացիան էլ պարտություն չէ: Լրիվ դաշնակի հոգեբանություն է. 120 տարի իրենց բարոյական հաղթանակներով Հայաստանի տարածքի 10 տոկոսն են հազիվ թողել սերունդներին:
Շատ շնորհակալ ենք ձեզանից, որ Ադրբեջանին չեք պարտվել: Մինչև գետին խոնարհվում եք: Հպարտ ենք ձեզանով: Մեր գոյությունը բացառապես ձեզանով է պայմանավորված:
Հ.Գ. Մենք չհասկացանք, թե Նիկոլը 2016-ին Լավրովի պլանին համաձայնվելը ինչո՞ւ էր համարում դավաճանություն: Հա՜, երևի այդ պլանով նախատեսվում էր Արցախը հայաթափել: Հալալ է ձեզ, որ վիժեցրել եք Լավրովի պլանը: