ՔՊ խմբակցության պատգամավոր, ԱԺ պետաիրավական հարցերի հանձնաժողովի նախագահ Վլադիմիր Վարդանյանը, անդրադառնալով Դիմադրության շարժման ակցիաներին, հայտարարել է, որ քաղաքական ճգնաժամ չկա, նրանք արհեստականորեն ցույց են տալիս, թե պարալիզացրել են։ «Շատ դժվար է որոնել սև կատու մութ սենյակում, մանավանդ, որ այդ սև կատուն մութ սենյակում չէ: Քաղաքական ճգնաժամ չկա, կան նույնիսկ ոչ քաղաքական ակցիաներ: Այն, ինչ ես տեսնում եմ, ավելի շատ նման է քեմպինգի (վրանային հանգիստ) և մշակութային բանի»,- «Aravot.am»-ի փոխանցմամբ ասել է Վարդանյանը:
Ի դեպ՝ երեկ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն է հայտարարել, որ բերման ենթարկված քաղաքացիների քանակով երեկվա օրն արդեն ռեկորդային է` 2008 թվականից հետո։ «400+ բերման ենթարկված չի եղել անգամ 2018 թվականի հեղափոխության ամենաթեժ օրերին»,- գրել է Իոաննիսյանը։ Հիմա, երբ այս թիվն ու ԱԺ պետաիրավական հարցերի հանձնաժողովի նախագահի ասելիքն ենք միացնում իրար, ստացվում է, որ իշխանությունն ինքն է սև կատու փնտրում մութ սենյակում այն դեպքում, երբ կատուն բացակայում է։
Եթե քաղաքական ճգնաժամ չկա, քաղաքական ակցիաներ գոյություն չունեն, այդ դեպքում ինչո՞ւ է ոստիկանությունը նոր ռեկորդ սահմանում, հետո էլ փակում ոստիկանության բաժինները՝ բերման ենթարկվածների քանակից կոլապսի մատնվելով։ Անտրամաբանական է նաև իրավիճակը քեմպինգային որակելը։ Պրիմիտիվ է ստացվում, բայց հանձնաժողովի նախագահը պետք է որ իմանա՝ քեմպինգի համար միայն վրանի առկայությունը բավարար չէ։ Քեմպինգը հանգստի ու ժամանցի ձև է, ոչ թե ոստիկանների հետ անհավասար ձեռնամարտի փառատոն։ Ավելի շուտ այսօրվա ԱԺ-ն է քեմպինգային տրամադրության մեջ. դրա համար էլ Վարդանյանի աչքին ամեն ինչ «մշակութային բան» է երևում։
Գոհար Վեզիրյան