Հայաստանի Եվրոպական կուսակցության առաջնորդ Տիգրան Խզմալյանը ֆեյսբուքի իր էջում գրել է. «Հիմա հասկանալի է՝ ինչու Նիկոլը շտապեց շնորհավորել Լուկաշենկոյին, որպեսզի դատի Ծռերին: Մարտի 1-ը Մինսկում օգոստոսի 9-ին էր»:
«ՉԻ». Հայաստանում շատերը համաձայն չեն, որ Փաշինյանն արագ շնորհավորեց Լուկաշենկոյին և, մեծ հաշվով, ճիշտ են, քանի որ շատ լուրջ փաստարկներ են բերում:
Բայց այս կարգի վերլուծությունները, այն էլ՝ կուսակցության առաջնորդի մատուցմամբ, զավեշտի են վերածում քննադատությունը: Ինչ կապ ունի Լուկաշենկոյին շնորհավորելը Ծռերի վերաբերյալ դատախազության մեղադրանքի հրապարակման հետ:
Թերևս Խզմալյանը հասկացել է, որ անհեթեթություն է ասածը և բավարարվել է միայն այս մի նախադասությամբ, չի բացատրել, թե ինչպես է եկել նման եզրահանգման:
Ընդհանրապես, եթե լսես Ծռերին, ապա աշխարհի քաղաքական օրակարգի առանցքն իրենց շուրջ է պտտվում: Պուտինը զանգեց և հրամայեց բանտարկել Ծռերին, իսկ զանգել էր, որովհետև նրան այդ մասին խնդրել էր Էրդողանը, քանի որ խանգարում են Մեծ Թուրանի ծրագրերին: Իր հերթին Լուկաշենկոն ուժ կիրառեց, որովհետև թեևավորվեց Փաշինյանի շնորհավորանքից, և այս կարգի բացահայտումներ:
Խզմալյանին թվում է՝ ոչ թե ռեալ քաղաքականությամբ է զբաղվում, այլ ֆանտաստիկ ֆիլմի սցենար է գրում: Հաջորդ էպիզոդում կբացահայտվի, որ կորոնավիրուսը աշխարհի ուժեղները միտումնավոր են բերել առաջին պլան, որպեսզի ստվերեն Ծռերի դատավարությունը: