Վրացական այս ուտեստը՝ փխալին, մանրացրած կանաչիով, բանջարեղենով կամ երբեմն նույնիսկ մսով ու ձկով նախուտեստ է: Ամենատարբեր մթերքներից փխալի պատրաստելու զանազան եղանակներ կան, սակայն այս ուտեստի մեջ ամենից հաճախ օգտագործվող բաղադրիչն ընկույզն է:
Բաղադրիչները
4 բաժնի համար
- 200 գ կաղամբ
- 100 գ ընկույզ
- 5-6 ճյուղ կամ 10 գ կանաչ սոխ
- 4-5 ճյուղ կամ 5 գ մաղադանոս
- 1/2 թ.գ. խմելի-սունելի
- 1/2 թ.գ. աղացած գինձ (кориандр)
- 1/2 թ.գ. չորացրած սխտոր
- 2 պտղունց աղացած կարմիր կծու պղպեղ
- 2 պտղունց աղ
Պատրաստման եղանակը
- Կաղամբի տերևները միջին չափի կտրատեք, լցրեք ջրով կաթսայի մեջ, դրեք կրակին, հասցրեք եռման աստիճանի: Եփեք 5-6 րոպե, մինչև կաղամբի փափկելը:
- Կաղամբը լցրեք ցանցի վրա, թողեք ամբողջությամբ քամվի:
- Բլենդերի մեջ լցրեք ընկույզը, աղը, խմելի-սունելին, աղացած գինձը, կարմիր պղպեղն ու չորացրած սխտորը:
- Կանաչ սոխն ու մաղադանոսը խոշոր կտրատեք, ավելացրեք բլենդերի պարունակությանը:
- Բլենդերով մեծ արագության տակ հարեք մինչև բաղադրիչների՝ մանր փշուրների վերածվելը:
- Ապա բլենդերի մեջ ավելացրեք կաղամբի եփած տերևները:
- Բլենդերով կրկին հարեք:
- Ստացված ընկույզակաղամբային զանգվածը լցրեք պնակի մեջ:
- Ձեռքով այդ զանգվածից մոտավորապես 30-32 գրամանոց գնդիկներ պատրաստեք ու տեղադրեք սկուտեղի վրա:
- Մատուցեք՝ ցանկության դեպքում զարդարելով կանաչու տերևներով կամ նռան հատիկներով: