ԱԱԾ նախկին պետ, «Հայրենիք» կուսակցության ղեկավար Արթուր Վանեցյանը հայտարարել է. «Եթե գամ իշխանության, գերիների հարցը մի քանի օրում կլուծվի՝ անձնական կապերի միջոցով»:
«ՉԻ». Պատերազմի ժամանակ Ռոբերտ Քոչարյանը, Լևոն Տեր-Պետրոսյանն ու Սերժ Սարգսյանը մի կողմ դրեցին Նիկոլ Փաշինյանի հետ ունեցած տարաձայնությունները և վերջինիս առաջարկեցին իրենց լիազորել՝ պատերազմի դադարեցման և լուծում գտնելու ուղղությամբ բանակցություններ վարելու համար: Այսինքն, նախկին ղեկավարները չասացին. թող Նիկոլը հեռանա, նոր դրանից հետո մենք կզբաղվենք պատերազմը դադարեցնելու հարցով: Որովհետև պատերազմի ամեն օրը ճակատագրական էր: Դա ուրիշ հարց է, թե Նիկոլ Փաշինյանն ինչպես արձագանքեց նախկին ղեկավարների առաջարկին:
Արթուր Վանեցյանին խորհուրդ կտանք Հայաստանի նախկին ղեկավարներից օրինակ վերցնել: Մենք հասկանում ենք, որ Նիկոլ Փաշինյանի հետ հիմա առնչվելը գործնականում անհնար է: Պատերազմի ժամանակ Նիկոլ Փաշինյանի վարքագծից հետո ոչ ոք այլևս չի ցանկանա նրան դիմել՝ լիազորություններ ստանալու և ինչ-ինչ հարցեր լուծելու նպատակով: Նիկոլ Փաշինյանի լիազորված անձ լինելը հիմա դրսերում այնքան էլ լուրջ չի ընդունվում: Եվ դեռ հարց է՝ եթե Արթուր Վանեցյանը նման հարցով դիմի կառավարությանը, իրեն կլիազորե՞ն, թե՞ ոչ: Կյանքի փորձով կարող ենք ասել, որ ոչ:
Բայց քանի որ խոսքը մարդկային կյանքեր փրկելու, մեր զինվորների, տղաների մասին է, Արթուր Վանեցյանը ճիշտ կաներ, որ իր կողմից աներ հնարավոր ամեն ինչ, այդ թվում՝ դիմեր կառավարությանը: Թեկուզ զզվելով, չուզենալով, բայց քայլ անի: Ու տեսնենք, թե Նիկոլ Փաշինյանն ինչպես կարձագանքի: Գերիների համար կարելի է նույնիսկ սատանայի հետ համագործակցել: