««Ժողովուրդ» օրաթերթի փոխանցմամբ՝ ՔՊ պատգամավորներ Արփի Դավոյանը, Վիլեն Գաբրիելյանը, Տրդատ Սարգսյանը և փոխվարչապետ Համբարձում Մաթևոսյանը կեղծել են «Քաղաքացիական պայմանագիր» կուսակցության՝ վարչության անդամների ընտրությունների արդյունքները։ Բողոքարկման գործընթաց է սկսել ՔՊ ներսում, որը կոորդինացրել է վարչության կազմ չընտրված Արսեն Թորոսյանը։ Թերթի տեղեկություններով՝ վերահաշվարկից հետո Արսեն Թորոսյանն ու ԱԻ նախարար Արմեն Փամբուխչյանը անցել են վարչության կազմ, իսկ նախկին ԼՀԿ-ական, Էդմոն Մարուքյանի սանիկ Հայկ Կոնջորյանն ու փոխվարչապետ Մաթևոսյանը դուրս են մնացել ցուցակից: Ի դեպ, վերջինիս համար 20 ձայն ապահովվել է Թորոսյանից ձայներ գողանալու հաշվին։
Անկեղծ ասած՝ մեկ է, թե ով կլինի ՔՊ վարչության կազմում, ով՝ ոչ։ Միևնույնն է, Նիկոլ Փաշինյանն է ամեն ինչ որոշողը, և մեկին մյուսով փոխարինելու փաստը որևէ կերպ չի փոխելու քաղաքական այս թիմի վարքագիծը։ Մյուս կողմից էլ սա հեղափոխական թիմի բարքերը նկարագրող իրադարձություն է։ Ժողովրդավարական բաստիոնների մերձակայքում թափառող թիմը կեղծում է ընտրությունները կուսակցական մակարդակում, և ուրեմն՝ հանգիստ կարող է նույն բանը անել համապետական տիրույթում։ Սկզբում ներսում փչանում են, հետո դրսում տարածում են փչացածության գարշահոտը։ Նույն փուլով է անցել հեղափոխությունը։ Դրան տիրացել են ներսի կուսակցականները՝ այն համարելով իրենց մենաշնորհը, հետո փչացրել են այն արժեքային ու գաղափարական հենքը, որի վրա խարսխված են, այսպես կոչված, բոլոր ժողովրդավարական հեղափոխությունները։
Գոհար Վեզիրյան