ԱԺ պատգամավոր Սերգեյ Բագրատյանի հետ «ՉԻ»-ն զրուցել է տնտեսության, կորոնավիրուսի համաճարակի հետևանքով առաջացած սոցիալական խնդիրների և դրանց լուծման տարբերակների մասին:
- Պարոն Բագրատյան, ՀՀ-ում նոր տիպի կորոնավիրուսի տարածումը կանխելու նպատակով հայտարարված արտակարգ դրության շրջանակներում մայիսի 4-ից հանվեցին սպասարկման ոլորտի որոշ ծառայությունների սահմանափակումները: Ինչպե՞ս եք գնահատում կառավարության այս որոշումը՝ կորոնավիրուսի համավարակի արձանագրված բարձր ցուցանիշների պայմաններում:
- Պետք է ընդունենք, որ Հայաստանը կտրված չէ մյուս երկրներից և պանդեմիան ընդգրկում է համատարած ողջ աշխարհը, ահա այսպիսի իրավիճակում Հայաստանի Հանրապետությունը չէր կարող առանձին քաղաքականություն վարել: Այս պահից սկսած կոնկրետ Վրաստանը ևս մայիսի հինգից հանում է սահմանափակումները և թույլատրում է որոշ ծառայությունների գործունեություններ: Դրանից առաջ Իսպանիան ու Իտալիան հայտարարեցին, որ որոշակի ոլորտների թույլատրվելու է աշխատել: Հայաստանի դեպքում ևս կարծում եմ՝ այլընտրանք չկա:
- Նիկոլ Փաշինյանը խոսելով կորոնավիրուսի հետևանքները չեզոքացնելու և կոմունալ վարձավճարների մասով պետության կողմից կատարվող փոխհատուցումների մասին՝ հայտարարեց, որ այն մարդիկ, ովքեր չունեն այդ գումարների կարիքը, պետք է վճարեն իրենց հարևան-բարեկամի փոխարեն: Ինչպե՞ս կմեկնաբանեիք:
- Ես կողմնակից եմ հստակ, որոշակի ձևակերպումների, երբ որոշումը տարընթերցումների ու թյուրըմբռնումների տեղիք չի տալիս: Կոնկրետ կոմունալ վարձավճարների մասով ես շատ հստակ կձևակերպեի՝ ասենք մինչև 20 հազար վճար ունեցող քաղաքացիների պարտքերը փակված են կամ մինչև 30 հազար դրամ սպասարկման վարձ ունեցողների գումարներից պետությունը կվճարի օրինակ 10 հազար դրամ: Իսկ սպասարկման ծառայությունների վարձավճարների հայտարարված 20 կամ 30 տոկոս մարումը մի տեսակ անորոշություն է առաջացնում: Մարդիկ չեն կարող ամբողջ օրը այդ թղթաբանությամբ զբաղվել: Իմ կարծիքով՝ պետք է գործել հստակ, կոնկրետ ու որոշակի:
- Գյուղատնտեսությամբ զբաղվող ֆերմերների մոտ դժգոհություն է առաջացրել այն փաստը, որ բանկերը գյուղվարկեր չեն հատկացնում: Գյուղացին չի կարողանում օգտվել մինչև մեկ միլիոն դրամ անտոկոս վարկերից: Ի՞նչ կասեիք այս մասին:
- Ենթադրենք կառավարությունը որոշել է զրոյացնել գյուղացիական վարկերի տոկոսադրույքները և ենթադրենք գյուղացին պայմանական վարկ ունի և դրա համար վճարելու է ասենք՝ 300-400 հազար դրամ տոկոս: Ընդունենք, որ նա այդ գումարը չի վճարելու, հարց՝ տոկոսադրույքը չվճարելով ի՞նչը փոխվեց այդ գյուղացու տնտեսության մեջ: Ի վերջո դա կարևոր կլինի, եթե երեք տարի հետո լրանա վարկի ժամկետը, և ինքը երեք ամիս շուտ ավարտի վարկը, սակայն հաջորդ օրվա համար դա էական նշանակություն չի ունենա:
Գյուղացին ունի նոր վարկի ֆինանսավորման, ֆինանսական ռեսուրսի ներդրման ցանկություն, որպեսզի ընդլայնի իր արտադրությունը: Եթե, օրինակ, նախորդ տարի նախատեսել էր 1000 քմ հողատարածքում բանջարաբոստանային կուլտուրաներ մշակել և այս տարի ցանկություն ունի 2000 քմ հողատարածքում բերք աճեցնել և նրան լրացուցիչ գումար է պետք, այդ դեպքում տոկոսների զրոյացումը նրա համար էֆեկտիվ չէ և հատկապես այս պահին խնդիր չի լուծում: Այ այստեղ պետք է զարգացման ծրագրով, գուցե առնվազն իր վարկի չափով վարկ տրամադրել և պահանջել, որ դա նպատակային օգտագործվի և պարենային անվտանգության ծրագրերին օգնի: Այսինքն, եթե գյուղացին կարող է սովորական ռեժիմով իր ընտանիքի հոգսը հոգալ և մի փոքր էլ ունենալ վաճառքի համար, մենք պետք է օգնենք, որ նա կրկնակի արտադրանք ունենա, որպեսզի մեր քաղաքացիների պարենային անվտանգության խնդիրը լուծենք: Այս իմաստով ես քննարկումների ժամանակ իմ մտահոգությունը հչեցրել եմ, և առաջարկել եմ, որ եղած գյուղատնտեսական հողերի 50 տոկոսից ավելին, որոնք անմշակ են, հենց ճիշտ ժամանակն է, որ կորոնավիրուսով պայմանավորված չմշակված հողերը սկսենք մշակել: Իսկ դա անելու համար եղած ուժերը բավարար չեն, կառավարությունը հստակ ծրագրեր պետք է մշակի, հստակ քայլեր կատարելու համար, որպեսզի մենք աշնանը բերք ու բարիք ունենանք, և գյուղատնտեսական ապրանքների խնդիրը լուծված լինի:
- Պարոն Բագրատյան, թավշյա հեղափոխության արդյունքում ձևավորված խորհրդարանը կարծես թե այնքան էլ չի տարբերվում նախորդներից: Հանրությունը ականատես է լինում, թե պատգամավորները ինչպես են բարձրագույն ամբիոնը օգտագործում միմյանց հայհոյախառն վիրավորանքներ հասցնելու համար: Ի՞նչ կասեիք այս մասին:
- Ընդհանրապես քաղաքական մշակույթը ենթադրում է որոշակի փոխադարձ հարգանքի մթնոլորտ: Ինչպես գիտենք, խորհրդարանը նաև բանավիճելու, խորհրդակցելու վայր է, բայց երբ բանավեճը անթույլատրելի ընթացք է ստանում, իհարկե, դատապարտելի է: Պատգամավորին անհարիր է խորհրդարանի ամբիոնից նման արտահայտություններ անելը, բայց այս խորհրդարանը անկարելի է համեմատել նախորդ խորհրդարանի հետ: Անհամեմատելի է:
Ոչ, քավ լիցի, ես չեմ խրախուսում այդպիսի պահվածքը, բայց թերևս հիշում եք նախորդ խորհրդարանում կերպարներ կային, որ ուղղակի զարհուրելի էր խորհրդարանի ներսում ունենալ նման պատգամավորներ:
- Հանրապետությունում հանցագործությունների թվի աճը և Գավառ քաղաքում կատարված արյունահեղությունը արդյո՞ք իրավապահների թողտվության արդյունք է: Անկառավարելի իրավիճակ էր ստեղծվել, որի պատճառով մարդկանց վիրավորվելու բազմաթիվ դեպքեր գրանցվեցին: Ինչպե՞ս կմեկնաբանեիք:
- Եթե չեմ սխալվում չորս, հինգ տարի առաջ նույն տարածքում նույնպիսի սպանություն տեղի ունեցավ՝ մարզպետի տեղակալի որդու հետ կապված, և կարծես թե այդ վենդետան շարունակվում է: Համենայնդեպս, եթե իրավապահները չկարողացան հանցագործությունը կանխել, ապա դա միայն խոսում է ոստիկանության վատ աշխատանքի մասին: Գավառում տեղի ունեցածը կարելի է վենդետա համարել:
Մելանյա Ծառուկյան