ՀՀ ազգային ժողովի փոխնախագահ, «Իմ քայլը» խմբակցության անդամ Ալեն Սիմոնյանի կարծիքով՝ ընդդիմությունը արտահերթ ընտրություններից հրաժարվել է, քանի որ գիտի՝ իշխող ուժը հաղթանակ կտանի. «ՀՀ-ի ամբողջ տարածքով մեկ Նիկոլ Փաշինյանի վարկանիշն ամենաբարձրն է: ՀՀ-ում որևէ ղեկավար իր պաշտոնավորման ընթացքում չի ունեցել նման վարկանիշ, ինչքան այսօր ունի Նիկոլ Փաշինյանը»:
«ՉԻ». «Այդ նույն Մյունհաուզենը ֆիլմում» բուրգոմիստերը ասում է. «Դա ավելին է, քան՝ փաստը. այդպես է եղել իրականում»: Մենք չենք հավատում, որ Հայաստանն ու Արցախը վարի տալուց հետո կգտնվի մեկը, որը կասի, թե Նիկոլ Փաշինյանի վարկանիշը ամենաբարձրն է հայոց պատմության մեջ: Չենք հավատում: Բայց իրականում այդպիսի բան եղել է:
Մի հատ սրանց անպատկառությանը նայեք: Այս իրավիճակում, երբ Հայաստանը ամեն օր նորանոր հարվածներ ու ապտակներ է ստանում, երբ մեր պետականությունը վերանալու եզրին է, սրանք էլի իրենց աննախադեպության և բացառիկության մասին են ճամարտակում:
Վերջերս մեկը հարց էր տվել. իսկ կարո՞ղ է, սրանք այս ամենը դիտմամբ են անում, որ հետո իրենց անմեղսունակ ճանաչեն ու գժի թղթով ազատվեն որևէ պատասխանատվությունից: Որովհետև նորմալ մարդը չի կարող արտահայտել այնպիսի մտքեր, ինչպես օրինակ՝ Ալեն Սիմոնյանը:
Քրքրեք պատմությունը՝ սկսած Նաբուգոդոնոսորից ու Թութմոս 1-ից, չկա, չեք գտնի գեթ մի փաստ, որ կապիտուլյացիա ստորագրած իշխանությունը ամենաբարձր վարկանիշն ունենա ու մի հատ էլ վստահ լինի, որ հաջորդ ընտրություններում հաղթելու է: Այդ առումով, այո, սրանք աննախադեպ են: Սրանց մեծ-մեծ խոսելու ու սրանց արածների արդյունքների տարբերությունը նույնպես բացառիկ է մարդկության պատմության մեջ: Էս կարող են առաջիկայում ներկայացնել որպես Փաստ N 864 և Փաստ N 865:
Հ.Գ. Ինչ ուզում եք ասեք, բայց Արթուր Վանեցյանին պետք է դատի տալ՝ Ալեն Սիմոնյանի պես ընկեր ունենալու համար: