ՀՀ նախկին ՄԻՊ Արման Թաթոյանը գրել է. «Այս օրերին իշխանության տարբեր շրջանակներ իրենց սոցիալական ցանցերով ու կեղծ էջերից սկսել են իմ անվան հետ կապված ուղղորդված արշավներ՝ ծայրահեղ վիրավորանքներով ու ատելությամբ:
Ակնհայտ է, որ անուն-ազգանունս քաղաքական մեծ վախեր է առաջացնում իշխանության պաշտոն ունեցող շատ մարդկանց մոտ:
Երկրի իրական կառավարման ու խնդիրներ լուծելու փոխարեն զբաղվում եք խառնակչությամբ: Ֆեյսբուքով երկիր կառավարելով` աղետի առաջ եք կանգնեցրել մի ողջ ժողովրդի, իրական վտանգի տակ եք դրել մեր պետականությունն ու անվտանգությունը:
«Ոտքից գլուխ» տապալել եք ձեր առաքելությունը, քանի որ ձեր պաշտոններն ավելի եք գերադասում երկրի շահերից ու անվտանգությունից»:
«ՉԻ». Լավ չի, էլի, պրն Թաթոյան: Ա-ն ասել եք, բ-ն էլ ասեք: Կարկառուն իշխանավորների մոտ ձեր մասին բացասական, ծայրահեղ վիրավորանքներով գրառումներ, մեկնաբանություններ աչքներովս չի ընկել: Բայց լրիվ հնարավոր է, ամեն ինչ սպասելի է, հաստատ ինչ-որ տեղ ձեր մասին գրած էլ կլինեն, վիրավորած էլ կլինեն, ինչը դատապարտելի է:
Բայց որ իշխանությունների վախերի մասին գրել եք, մի կես բերան էլ ընդդիմության վախերի մասին հիշատակեիք: Այդպես ավելի օբյեկտիվ կլիներ: Ընդամենը օրեր առաջ էինք մի կարկառուն քոչարյանականի ստատուսը ներկայացրել, որտեղ զայրույթ էին հայտնել, որ ինչ-որ մարդիկ ձեզ են տեսնում վարչապետի ղեկին:
Ձեզ որակել էին հավայի ստատուսչի, փողով գրող: Մենք էլ ամոթանք էինք տվել գրողին, թեպետ դա դուք պետք է անեիք: Թող չստացվի, էլի, որ այս իշխանությունները հրեշներ են, ընդդիմությունն էլ՝ առաքինի հրեշտակներ:
Հ.Գ. Մի կես բերան էլ Գյումրիում 80 տարեկան ծերունուն ծեծի ենթարկելու դեպքին անդրադարձեք: Ձեզ վարչապետ տեսնելու ցանկություն հայտնողների թիվը առնվազն կրկնապատկվի: