«Ինձ համար ակնհայտ է, որ ՀՀ օրհներգը վաղ թե ուշ պիտի փոխվի․․․ մենք նաև պետք է քննարկենք զինանշանի փոփոխության հարցը․ առնվազն չի կարող Հայաստանը լինել ջրի տակ․․․ չի կարող առյուծը լինել ֆեյսբուքյան սմայլիկի նման, չի կարող Հայաստանը պաշտպանող սուրը լինել շղթայված», հայտարարել է ԱԺ նախագահ Ալեն Սիմոնյանը։
Խնդիրը, իհարկե, զինանշանի «բովանդակությունը» չէ, որովհետև այդ դեպքում կառաջարկվեր, օրինակ, որ ջրի փոխարեն պատկերված լինեին սուբվենցիոն ծրագրերով կառուցված խելացի գոմեր, «ֆեյսբուքյան սմայլիկով առյուծի» փոխարեն լիներ զրահապատ BMW-ով եղջերու, իսկ «շղթայված սրի» փոխարեն՝ սելֆիի ձողիկ։
Խնդիրն այն է, որ ՀՀ զինանշանը սահմանված է գործող Սահմանադրությամբ, այսինքն՝ այն փոխելու համար պետք է փոխել Սահմանադրությունը, ինչի մասին Ադրբեջանը վերջերս հաճախ է խոսում։ Այլ կերպ ասած՝ Ալեն Սիմոնյանն ավելի անկեղծ կլիներ, եթե ասեր «առնվազն չի կարող Հայաստանն ունենալ այնպիսի Սահմանադրություն, որին Ադրբեջանը դեմ է»։
Ինչ վերաբերում է օրհներգին, ապա հենց միայն դրա անվանումը՝ «Մեր հայրենիք», հակասում է իշխանությունների աշխարհայացքին։ Ի՞նչ հայրենիք, մեր հայրենիքը պետությունն է, հետևաբար՝ դրա առաջին տողերը պիտի հնչեն այսպես․ «Մեր պետություն, ազատ անկախ, (ԵԱՏՄ ինադու), յուր որդիքը արդ կոչվում են պարտաճանաչ հարկատու․․․»։