«Բարգավաճ Հայաստան» կուսակցության նախագահ Գագիկ Ծառուկյանը «Ժողովուրդ» օրաթերթի հետ զրույցում զարմանք հայտնեց, որ իրեն մեղադրում են կառուցելու մեջ: «Անընդհատ այդ «կառուցել» բառն է, ուրիշ բան չկա։ Այսինքն ստացվում է, որ մեր երկրում կառուցելը հանցա՞նք է»:
«ՉԻ». Չէ, կառուցելը հանցանք չէ: Բայց նայած, թե ինչ և ոնց ես կառուցում: Եթե գործարան է կառուցվում՝ աշխատատեղերով, դա միայն գովելի է:
Բայց եթե Երևանի կենտրոնում, Օլիմպիական կոմիտեի շենքի վրա հարկեր են ավելացվում, հայկական ճարտարապետության հայտնի շենքերից մեկի տեսքը աղավաղում, դրա ի՞նչը գովես:
Ծառուկյանի տրամաբանությամբ ստացվում է, որ մեկը գիշերը թաքուն իր տան դեմը ավտոտնակ է կառուցում, դա էլ հանցանք չէ, որովհետև կառուցել է: Հիմա ոնց է կառուցել, էական չի:
Իսկ Հիսուսի արձան կառուցելը, շինելը, ցցելը... ինչպես դասականներից մեկն էր ասել, դա ավելին է, քան՝ հանցանքը, դա սխալ է:
Հ.Գ. Բա ինչքան կգովեինք, եթե Աբովյանում մի հատ հյուրանոց կառուցվեր: