ՀՀ վարչապետի կինը՝ Աննա Հակոբյանը, ֆեյսբուքյան իր էջում գրել է. «Պատերազմի ժամանակ վարչապետի կինը ի՞նչ գործ ուներ հրամանատարական կետերում (բունկերներում), խրամատներում, զորամասերում, պոլիգոններում, գեներալների, սերժանտների, շարքայինների, ՄՈԲ-ի հետ նույն վայրերում։
Երկու տարի է` Հայաստանում և Հայաստանից դուրս տարբեր մարդիկ իրենց ինտելեկտի, արժեքային համակարգի և բարոյական ընկալումների սահմաններում այս հարցերի շուրջ ինձ խոշտանգումների են ենթարկում, ամենապիղծ պիտակավորումներով նվաստացնում:
Անկեղծ չգիտեմ, ո՞րն է նախընտրելի՝ մեռնելուց հետո կենդանիները անշունչ մարմինդ հոշոտեն-պղծե՞ն, թե՞ հայրենակիցներդ ողջ-ողջ հոգիդ հոշոտեն, անունդ պղծեն։
Արդյո՞ք պատերազմի շրջանում վարչապետի կնոջ գտնվելու վայրի, նիստուկացի, հագուկապի և գործողությունների պրոտոկոլ գոյություն ունի։ Գուցե գոյություն ունի, և գուցե ըստ այդ պրոտոկոլի վարչապետի կինը պետք է սահմանափակվեր բացառապես թիկունքային աշխատանքներով։
Տրամաբանական է։ Պարզապես, թիկունքում այդ ժամանակ տեղ չկար, մեծ խցանում էր առաջացել. 10 միլիոն մարդ թիկունքից աջակցում էր կրակի տակ ընկած 100-200 հազարին»:
«ՉԻ». Այսքան երկար ստատուս գրելով՝ վարչապետի տիկինն ընդամենը պետք է գեթ մի օրինակ բերեր, թե որ պետության ղեկավարի կինն է պատերազմի ժամանակ հրամանատարական բունկերում գտնվել: Պատմությունից մի օրինակ բերեր: Որ ասեինք՝ հա, դե, որոշ իրավիճակներում դա լիովին հնարավոր է, նորմալ է, ոչինչ, պատահում է:
Տասնյակ պատերազմներ վարած Նապոլեոնը երկու կին է ունեցել. Ժոզեֆինան և Մարիա-Լուիզան: Մի հատ ճշտեք՝ երբևիցե ռազմական թատերաբեմում երևացե՞լ են:
Լավ, ի՞նչ Նապոլեոն: Լևոն Տեր-Պետրոսյանի, Ռոբերտ Քոչարյանի կամ Սերժ Սարգսյանի կանանց որևէ մեկը տեսե՞լ է հրամանատարական կետերում, գեներալների հետ, գենշտաբում: 1990-ականների թեկուզ ամենածանր պահերին: Չէ: Զինվորական, ռազմական կանոնակարգով օտար մարդու ներկայությունը բարձրագույն հրամանատարական կետում նոնսենս է, եթե այդ մարդը նույնիսկ երկրի ղեկավարի կինն է:
Այս երկու տարվա մեջ մի քանի անգամ լսել ենք, թե Փաշինյանը Աննա Հակոբյանին ուղարկել էր հրամանատարական բունկեր, քանի որ զինվորական ղեկավարությունից լիարժեք, հավաստի տեղեկություններ չէր ստանում, կամ չէր վստահում գեներալներին: Դե, կներեք, եթե չէր վստահում, թող Աննա Հակոբյանին էլ նշանակեր ՀՀ ՊՆ նախարար կամ Գլխավոր շտաբի պետ, ամեն ինչ տեղը կընկներ:
Հ.Գ. Իսկ ինչ վերաբերում է խոշտանգումներին, լավ կլիներ՝ Աննա Հակոբյանը մի երկու տեսանյութ գցեր Տելեգրամ-ալիքներում, տեսնեինք՝ այդ ինչպես են իրեն խոշտանգել: Որովհետև մինչև հիմա մեր տեսած տեսանյութերում հայ զինվորներն են խոշտանգվում: