«ՀՀ երկրորդ նախագահ Ռոբերտ Քոչարյանի ազատության համար ստորագրողների թիվը 60 հազարից կավելանա, որովհետև բացի նրանից, որ Ռոբերտ Քոչարյանը մշտապես ունեցել է աջակիցներ, հիմա նաև շատերը սկսել են տեսնել, թե ինչ է կատարվում դատական համակարգում։ Ռոբերտ Քոչարյանը երբեք չի հենվել ցույցային և միտինգային քաղաքականության վրա։ Ռոբերտ Քոչարյանը միշտ հայտնվել է պաշտոնի, երբ ուժեղ ղեկավարի կարիք է զգացվել։ Ինչքան շարունակեն ճնշել դատավորին, այնքան Քոչարյանի վարկանիշն աճելու է»:
168.am կայքի հետ զրույցում նման մտքեր է հայտնել Տիգրան Քոչարյանը:
«ՉԻ». Ահա այսպիսի «գլուխգործոցների» արդյունքում Սերժ Սարգսյանը հայտնվեց այնտեղ, որտեղ հիմա գտնվում է: Միշիկական ծագում ունեցող պրոպագանդիստները փափուկ բարձ դրեցին Ազատիչի գլխի տակ, և նա չհասկացավ, թե ինչն է կատարվում:
Եվ հիմա նույն փղերը հանձն են առել Քոչարյանի պիառը: Դժվար ասել, թե ինչ էլ ավելի վատ վիճակում է հայտնվելու Քոչարյանը:
Տիգրան Քոչարյանի կարծիքով մարդիկ կույր ու խուլ են եղել և չեն իմացել, թե ինչ է կատարվում Քոչարյանի և Սարգսյանի ժամանակների դատարաններում: Նրանք չգիտեն և չեն էլ պատկերացնում, թե ինչ կկատարվեր դատավորի հետ, եթե նա փորձեր հակառակ գնալ երկրորդ և երրորդ նախագահների կամքին: Իսկ այժմ կան բազմաթիվ նման դատավորներ, որ ճնշումների ենթարկվելու փոխարեն առոք-փառոք հարցազրույցներ են տալիս և գլուխ գովում՝ պաշտպանում ենք նախորդ հանցագործ ռեժիմին:
Ինչ վերաբերում է ուժեղ ղեկավարի մասին մտքի փայլատակումներին: Ուժեղ ղեկավարը պալատական հեղաշրջումներ կազմակերպելը և ժողովրդի վրա տանկեր հանելը չէ: Այդպիսի «ուժեղության» համար է այսօր դատվում Քոչարյանը: Ուժեղ ղեկավարը ժողովրդին առաջնորդելն է, ուղենիշներ տալն ու ականջալուր լինելը: Քոչարյանը զուրկ է այդ որակներից, և նրա աջակիցները մնալու են այն մի քանի հարյուրը, որ այսօր բառի ուղիղ իմաստով սնվում են նրա ձեռքից: