ԲՀԿ նախագահ Գագիկ Ծառուկյանը հայտնել է իր նոր նախաձեռնության մասին:
«Ժամն է կրկին հավատքով միախմբվելու: Ուստի իմ ընտանիքի նախաձեռնությամբ հայտարարվում է մրցույթ՝ Հայաստան աշխարհի բարձունքում Հիսուս Քրիստոսի արձանը կառուցելու համար: Թող այն վերածնունդի և լույսի ճանապարհ ցույց տա հայ ժողովրդին»,- գրել է նա:
«ՉԻ». Լավ բան է մտածել Գագիկ Ծառուկյանը: Թե չէ ընկել, քաղաքական դաշտի համախմբման անկապ կոչեր են անում, երեք նախագահների միասնության հորդորներով են հանդես գալիս, անիմաստ ժամանակ վատնում:
Մարդը միանգամից լուծումը տալիս է. արձանը դնում ենք և վերջ. միախմբվում և վերածնվում ենք: Մինչև հիմա եղած արձանները նման էֆեկտ չունեին:
Արձանի բարձրությունը պետք է առնվազն 33 մետր լինի, որ գերազանցի Ռիո-դե-Ժանեյրոյում Հիսուսի արձանը, որն ընդամենը 30 մետր է: Զբոսաշրջության կենտրոնը Բրազիլիայից կտեղափոխվի Առինջ-Ավանի բլուր:
Ընդ որում՝ դա լինելու է 5-րդ սերնդի բազմաֆունկցիոնալ արձան. բացի ազգին համախմբելուց, կարելի է մեջը ՀՕՊ համակարգ տեղադրել «Բայրաքթարներ» խոցելու համար, իսկ հետո՝ գլխավերևում կարելի է մի 7-8 հարկ ավելացնել, ընտիր հյուրանոց դարձնել:
Հեսա կտեսնեք, թե Ալիևը ինչ հիստերիայի մեջ է ընկնելու: Ամենաշատը դրանից է վախենում, որ մենք կհամախմբվենք արձանի շուրջը:
Հ.Գ. Հուսով ենք, Աբովյանի նորընտիր քաղաքապետը արձանը տեղադրելու համար տարածք և համաձայնություն կտա: